نوبل للِّي قصفنا.. وولاية للِّي باعنا!
في مشهد ما ينبلع لا بسياسة ولا بعقل بشر، رئيس الوزراء محمد شياع السوداني قرّر يرشّح دونالد ترامب — إي نعم، ترامب الحالي نفسه — لجائزة نوبل للسلام!
سلام؟! لو سِلام؟
ترشيح أثار موجة ضحك سوداء بالبلد… ضحك ممزوج بحسرة، لأن الموضوع مو مجرد “زلة لسان”، هذا قرار رسمي شكله انكتَب على ورق مطبوع من مكتبة “ألف دينار كلشي”.
النائب مصطفى سند طلع على التلفزيون وگالها بصراحة:
“ما حد يدري، ما حچالنه، وما استحى… ترشيح ترامب؟! وصمة عار سياسية.”
والحچي عن “دماء الشباب” مو مجرد شعارات… ترامب اللي انرشّح، هو نفس الشخص اللي هزّ العراق بقصف، عمليات، وملفات بعده دخانها ما راح.
الباحث السياسي صباح العكيلي هاله الموقف، وگال إن السوداني ماشي بدون بوصلة… يخالف الإطار، يتحرك فردياً، مرة يروح سرياً، مرة يرشّح ترامب علناً. خطوات محسوبة؟ ولا خطوة وحدة حسبت عدل.
أما وسيم الأغا فأخذها من زاوية ثانية:
“السوداني محرج الإطار ومعلّگهم بنص الطريق. لا هية سياسة ولا هيبته رئاسة… هذا بحث عن دعم خارجي بأي ثمن”.
ووصل بيه المقام يگول: لازم تُرفع عليه دعوى لأنه خالف خط الإطار… زين بعد شوي يطالبون بشطب الترشيح من التاريخ!
ترامب من جهته، ما صدّگ… طلع يكول:
“رئيس وزراء العراق صديقي، وقد رشّحني للجائزة.”
إي صَدّگ عاد… صديق؟ لو رئيس وزراء معتبرك “بابا نويل السياسي”؟
ترامب مستمتع بالهدية، والسوداني ينتظر المقابل… بس الحقيقة:
ترامب أخذ الصورة، والسوداني أخذ العاصفة.
الترشيح انحسب على السوداني مو على العراق.
الإطار ممتعض، الشارع مستغرب، والناس تسأل:
شنو دخل نوبل بمن قتلنا؟ وشنو دخل السلام بصاروخ دگ بابنا؟
أما لجنة نوبل؟
يبدو فعلاً عقدوا اجتماع طارئ… مو لمعالجة الطلب، لا…
لمنع انفجارهم من الضحك.
وتبقى الحقيقة:
عندما تصبح السياسة “طلب ترضية”، يصبح الكرسي أثقل من عقل صاحبه.
ويا شعب…
اصبروا، لأن المسرحية مستمرة — والجمهور مجبور يشوفها للنهاية.
